Gyda digonedd o le i’ch gwesteion i ymlacio a mwynhau’r dathliadau, mae Tŷ Sain Tewdrig yn lle delfrydol i gynnal priodas. Does nunlle gwell na’n teras mawr a’r gerddi hardd i groesawu’ch gwesteion gyda diod, ac mae’r lawnt eang yn lle gwych i gynnal gemau gardd. Gall eich gwesteion hefyd gymryd seibiant o holl fwrlwm y dathlu a mynd i gael golwg ar y ddôl o flodau gwyllt tymhorol. Fel y gallwch ddychmygu, mae ffotograffwyr yn cael modd i fyw yn Nhŷ Sain Tewdrig gan fod y gerddi a’r golygfeydd penigamp o gefn gwlad yn gefndir mor ffantastig i’r lluniau hollbwysig.

Yn ogystal â’r teras, mae ystafelloedd derbyn clyd Y Tŷ, lle mae digonedd o seddi cyfforddus a golygfeydd bendigedig drwy’r drysau Ffrengig a’r ffenestri cyfnod, yn lle perffaith i gymysgu gyda’ch gwesteion. Tu mewn neu y tu allan, mi fyddwn ni’n sicrhau bod y diodydd yn llifo a’ch bod chi a’ch gwesteion yn cael modd i fyw. Gall cerddoriaeth fyw greu awyrgylch arbennig a chynnig cyfeiliant gwych i’ch diodydd croeso, ac ry’n ni’n nabod sawl cerddor penigamp pe bai angen argymhellion arnoch.

Tra’ch bod chi’n mwynhau diodydd a chanapes gyda’ch gwesteion, byddwn ni wrthi’n brysur yn paratoi’r Cwrt ar gyfer eich gwledd briodas. Pan fydd y blodau yn eu lle a’r canhwyllau wedi’u cynnau, bydd cyfle i chi’ch dau gael eich syfrdanu gyda chipolwg o’r ystafell fawreddog cyn i’ch gwesteion fynd i mewn.

Bydd croeso wedyn i chi fwynhau pum munud fach dawel gyda’ch gilydd tra bod eich gwesteion yn cymryd eu seddi. Efallai y byddwch chi’n dewis mynd am dro drwy’r gerddi a thynnu ambell lun rhamantus. Beth bynnag a wnewch chi, mi fyddwn ni’n barod ac yn aros i’ch croesawu i’ch gwledd briodas gyda llond gwlad o gyfarchion a chymeradwyaeth gan eich gwesteion.

Eisteddwch yn ôl, ymlaciwch a mwynhewch eich gwledd briodas yn Y Cwrt gyda hyd at 150 o westeion. Pryd bwyd tri chwrs moethus neu rywbeth llai ffurfiol; pa bynnag un sy’n mynd â’ch bryd, bydd arlwywyr mewnol Tŷ Sain Tewdrig, Cleverchefs, yn sicrhau eich bod chi a’ch gwesteion yn derbyn pob gofal.

Ar ôl eich gwledd briodas a’r areithiau, byddwn yn eich gwahodd chi a’ch gwesteion i wneud eich ffordd yn ôl i ystafelloedd derbyn Y Tŷ, lle bydd te a choffi yn cael eu gweini. Bydd y Bar Potel ar agor hefyd er mwyn i chi barhau â’r dathliadau! Os byddwch chi’n gwahodd gwesteion ychwanegol i ymuno â chi ar gyfer y parti nos, dyma fydd y lle perffaith i’w cyfarch a rhoi cyfle iddynt brofi hud Tŷ Sain Tewdrig ac ymuno gyda’r dathlu.

Daw’r Cwrt yn fyw gyda’r nos, lle gallwch bartio gyda hyd at 150 o westeion. Bydd eich band neu DJ yn eich disgwyl a bydd y goleuadau’n cael eu pylu i greu’r awyrgylch perffaith ar gyfer noson llawn hwyl a dawnsio. Mae’r prif far wedi’i leoli’n gyfleus yn y Y Cwrt ei hun sy’n golygu na fydd angen i neb adael yr ystafell lle mae’r llawr dawnsio. 

Cyn noswylio, efallai bydd awydd arnoch i ymgynnull yn y gegin i rannu diod a chyfnewid straeon gyda’r gwesteion hynny sy’n aros gyda chi yn Y Tŷ. Yna wrth i chi ei throi hi am foethusrwydd Cariad, eich swît briodasol, caiff eich gwesteion edrych ymlaen at aros yn un o’n saith ystafell wely hyfryd.